कांग्रेस सभापति शेरबहादुर देउवा र उनकी पत्नी डा.आरजु राणा देउवा डिस्चार्जपछि ललितपुर सर्ने भएका छन् । जेन–जी आन्दोलनमा आक्रमणकारीबाट सख्त घाइते भएका देउवादम्पतीको सैनिक अस्पताल छाउनीमा उपचार भइरहेको छ ।
पूर्ण स्वास्थ्य लाभपछि उनीहरू ललितपुर सर्ने योजनामा छन् । तर, ललितपुरमा सानेपा या जावलाखेलमध्ये कहाँ सर्ने अन्तिम टुंगो लागिनसकेको प्रचार विभागका प्रमुख मीन विश्वकर्माले जानकारी दिए । ‘उहाँहरू ललितपुरमा सर्नुहुन्छ, तर सानेपा या जावलाखेलमध्ये कहाँ सर्ने टुंगो लागिसकेको छैन,’ उनले भने । सानेपा आरजुको माइतीघर हो भने जवालाखेल उनको भाइ भूषण राणाको निवास हो । दुईमध्ये एउटामा सर्ने तयारी भए पनि उनीहरूको परिवारले नै अन्तिम निर्णय लिने विश्वकर्माले बताए ।
उनीहरूको स्वास्थ्यमा क्रमिक सुधार भइरहेको छ । उनीहरू दुवै बोल्ने, सामान्य हिँड्डुल गर्ने, बाथरुम जाने गर्छन् । तर, देउवाको पछाडिपट्टिको घाउ पूर्ण निको नभइसकेको र ड्रेसिङ गर्नुपर्ने अवस्था रहेकाले अझै एक–दुई दिनपछि मात्र अस्पतालले डिस्चार्ज गर्ने तयारी गरेको छ ।सभापति देउवा उपसभापति पूर्णबहादुर खड्कासहित अधिकांश नेताहरूसँग नियमितजस्तै टेलिफोन सम्पर्कमा छन् ।
अस्पतालमा नेताहरूको भिडभाड हुने सम्भावनाका कारण अहिले कसैलाई भेट गर्न दिइएको छैन । तर, पार्टी सञ्चालनका लागि भने पदाधिकारीसहित अधिकांश नेता सम्पर्क र समन्वयमै रहेको प्रचार विभाग प्रमुख विश्वकर्माले जानकारी दिए । नियमित घटनाक्रमबारे उपसभापति खड्काले नै देउवालाई ब्रिफिङ गर्दै आएका छन् ।
