लद्दाखलाई पूर्ण राज्यको माग गर्दै राजधानी सहर लेहमा विद्यार्थीहरुले बुधबार व्यापक प्रदर्शन गरेका छन् । प्रदर्शनका क्रममा विद्यार्थीहरूले भारतीय जनता पार्टी (भाजपा)को स्थानीय कार्यालयमा समेत आगजनी गरेका छन् ।
आन्दोलन चर्किएसँगै लद्दाखलाई पूर्ण राज्यको मान्यता दिन माग गर्दै १५ दिनदेखि भोक हड्तालमा बसेका सामाजिक अभियन्ता सोनाम वांगचुकले पनि हड्ताल तोडेका छन् ।
आन्दोलनरत विद्यार्थीहरूले संविधानको छठौँ अनुसूचीअनुसार लद्दाखलाई पूर्ण राज्यको मान्यता दिनुपर्ने माग गरिरहेका छन् । प्रदर्शनका क्रममा विद्यार्थीहरूले सडकमा गाडीहरू जलाएका छन् भने केही भवनहरूमा समेत आगजनी गरेका छन् ।
आन्दोलन चर्किएसँगै प्रशासनले लद्दाखमा निशेधाज्ञा जारी गरेको छ । निशेधाज्ञाको बाबजुत पनि विद्यार्थीहरूले प्रदर्शन चर्काइरहेका छन् । हिंसाका घटना बढ्दै गएपछि प्रहरीले अश्रुग्यास प्रहार गरेको छ । कतिपय स्थानमा प्रहरी र विद्यार्थीबिच झडप समेत भएको छ । यसैबिच सामाजिक अभियन्ता वांगचुकले विद्यार्थीलाई शहरमा शान्ति कामय राख्न अपिल गरेका छन् ।
यसकारण विद्यार्थीहरू आन्दोलित
सन् २०१९ मा भारत सरकारले संविधानको धारा ३७० को व्यवस्था खारेज गर्दै जम्मू–कश्मीर र लद्दाखलाई अलग अलग केन्द्रद्वारा शासित राज्य घोषणा गरेको थियो । सोही कारण त्यसबेलैदेखि यी राज्यलाई पूर्ण राज्यको माग उठ्दै आएको थियो । सामाजिक अभियन्ता सोनाम वांगचुकको नेतृत्वमा यो माग चर्किदै आएको थियो । संविधानको छठौँ सूचीमा हरेक राज्यलाई पूर्णरुपले संवैधानिका सुरक्षाको ग्यारेण्टीको व्यवस्था छ । यस्तै, विद्यार्थीहरूले लद्दाखबाट लोकसभामा दुई सिट हुनुपर्ने माग पनि गर्दै आएका छन् । साथै सरकारी जागिरमा पनि लद्दाखवासीलाई विशेष महत्व दिनुपर्ने उनीहरूको माग छ ।
