आगामी वर्ष अमेरिकामा हुने अस्कर अवार्डका लागि नेपालस्थित छनोट समितिको निर्णयविरुद्ध चलचित्रकर्मीहरुले अमेरिकास्थित मुख्यालयमा उजुरी दिएका छन्। आइतबार छनोट समितिको निर्णयमा आपत्ति जनाउँदै नेपाली चलचित्रर्मीहरुले अस्कर अवार्डको मुख्यालयमा उजुरी दिएका हुन्।
दीपक रौनियार, समुन्द्र भट्ट, विनोद पौडेल, एलन आर मिलिगन, नाजिर हुसेन, आशा मगराती, नवीन सुब्बा, रामकृष्ण पोखरेल, दीपेन्द्र लामा, पूर्णसिंह बराइली, मनोज पण्डित, अमोद राई, राजन कठेत, मनोजबावु पन्तलगायतले हस्ताक्षरसहितको उजुरी लस–एन्लसस्थित एकेडेमी अफ मोसन पिक्चर्स एन्ड साइन्सेजमा बुझाएका छन्।
उजुरी पत्रमा आगामी ९८औं अस्करको अन्तर्राष्ट्रिय फिचर विधाको लागि नेपालबाट ‘अञ्जिला’लाई सिफारिस गर्ने निर्णयलाई खारेज गर्न माग गरिएको छ। निर्देशक दिपक रौनियारले उजुरी पत्रको बोधार्थ काठमाडौंस्थित चलचित्र विकास बोर्ड र समितिलाई पनि पठाएको बताए। ‘हाम्रो माग स्पष्ट छ, समितिले हालको निर्णायक खारेज गरोस्, नयाँ आवेदन खुलाओस् र पारदर्शी प्रक्रियामार्फत योग्य सबै फिल्महरु हेरेर निर्णय गरोस्,’ निर्देशक रौनियारले भने।
आवेदन प्रक्रिया पारदर्शी र वैज्ञानिक नभएको समेत उजुरी पत्रमा दाबी गरिएको छ। समितिले अस्कर अवार्डका लागि आवेदन खुलेको जानकारी ११ भदौमा आफ्नै फेसबुक पेजमार्फत जानकारी गराएको थियो। २० भदौसम्मका लागि आवेदनको समय तोकेको थियो। तर, १९ भदौदेखि सरकारले फेसबुकलगायत सामाजिक सञ्जाल बन्द गरिदिएको थियो।
विगतमा २० दिनदेखि एक महिनासम्म आवेदन अवधि राख्ने गरिएकोमा यसपालि नौ दिनमात्रै राखिएको तथा सामाजिक सञ्जाल बन्द र त्यसपछिको आन्दोलनमय विषम परिस्थितिमा गोप्य रूपमा निर्णय गरिएको भन्दै चलचित्रकर्मीले आलोचना गरेका छन्।
छनोट समितिको सदस्य आबद्ध रहेकै फिल्म छनोट भएकोदेखि एक सदस्य अमेरिकामा बसेर निर्णयलाई सदर गरेको भन्दै चलचित्रकर्मीहरुले आपत्ति जनाएका छन्। समितिले ‘अञ्जिला’लाई छनोट गरेर बिहीबार (२ असोज)मा सिफारिस गरेको थियो।
छनोट समितिका अध्यक्ष विमल पौडेलले तत्काल पाँचदेखि सात दिनसम्मका लागि आवेदन खुलाई अन्य चलचित्रलाई पनि समेटेर निर्णय लिने नयाँ पत्रिकालाई बताएका थिए। चलचित्रकर्मीको गुनासो र सुझाव सम्बोधन गर्न समितिले फेरि आवेदन लिएर छनोट प्रक्रिया दोहो¥याउने उनले बताएका थिए।
