भारतले एसिया कप २०२५ को सुपर-४ खेलमा पाकिस्तानलाई ६ विकेटले हराएको छ। १७२ रनको लक्ष्य पाएको भारतले १८.५ ओभरमा ४ विकेट गुमाएर पूरा गर्यो। अभिषेक शर्मा र शुभमन गिलले ९.५ ओभरमा १०५ रन जोडे।
गिल २८ बलमा ४७ रन बनाएर आउट भए। अभिषेकले ३९ बलमा ७४ रन बनाए, जसमा ५ छक्का र ६ चौका थिए। सूर्यकुमार यादव खाता नखोली आउट भए। स्यामसन १३, तिलक वर्मा ३० र हार्दिक ७ रनमा अविजित रहे।
पाकिस्तानले पहिले ब्याटिङ गर्दै ५ विकेट गुमाएर १७१ रन बनाएको थियो। साहिबजादा फरहानले ४५ बलमा ५८ र साइम अयुबले १७ बलमा २१ रन जोडे। फखर जमान १५ र हुसेन तलत १० रनमा आउट भए।
पाकिस्तानी फिल्डरहरूले अभिषेक र गिललाई पञ्जाबीमा गाली गरेका थिए। अभिषेकले भने, ‘पाकिस्तानी खेलाडीहरू बिनाकारण बहस गरिरहेका थिए, जुन मलाई मन परेन। मैले ब्याटले जवाफ दिएँ।’ उनको विस्फोटक ब्याटिङले उनलाई खेलको उत्कृष्ट खेलाडीको अवार्ड दिलायो।
पाँचौं ओभरमा हरिस रौफ र अभिषेकबिच चर्को वादविवाद भयो। गिलले हरिसलाई चौका हानेपछि हरिसले अभिषेकलाई केही भने, जसले विवाद भयो। अम्पायरले हस्तक्षेप गर्नुपर्यो। अभिषेकले खेलपछि भने, ‘आज सामान्य दिन थियो। उनीहरूको आक्रमण मन परेन, त्यसैले म पछि लागेँ। म टोलीका लागि राम्रो प्रदर्शन गर्न चाहन्छु।’
अभिषेकले गिलसँगको साझेदारीबारे भने, ‘हामी स्कूलदेखि सँगै खेल्छौं, एकअर्काको साथ रमाइलो लाग्छ। हामीले यो गर्नेछौं भन्ने सोचेका थियौं, आज त्यो दिन थियो। टोलीको समर्थनले म कडा परिश्रम गर्छु र मेरो दिनमा जित्छु।’ एजेन्सी
