भेनेजुएलाका कार्यवाहक राष्ट्रपति डेल्सी रोड्रिगेजले आम माफी विधेयक प्रस्तुत गरेकी छन् । जसले राजनीतिक कारणले जेलमा रहेका सयौँ व्यक्तिहरूको रिहाइको अवसर प्रदान गर्न सक्छ ।
यसमा विपक्षी नेता, पत्रकार र मानवअधिकारकर्मीहरू पनि समावेश हुन सक्ने सम्भावना छ । अमेरिकी समर्थन प्राप्त विपक्षी समूहले यस कदमको अपेक्षा लामो समयदेखि गरेका थिए ।
रोड्रिगेजले राष्ट्रपतिको जिम्मेवारी सम्हालेपछि संसदमा विधेयकलाई प्राथमिकताका साथ विचार गर्न आग्रह गरेकी छन् । उनले समारोहमा भनिन्, “यो कानुनले राजनीतिक द्वन्द्वका कारण उत्पन्न घाउहरू निको पारोस्, न्यायको पुनर्निर्देशन गरोस् र भेनेजुएलियनहरूबिच सहअस्तित्वलाई प्रोत्साहन गरोस् ।”
साथै, उनले काराकसको हेलिकोइड जेल बन्द गर्ने घोषणा गरिन् । यसलाई भविष्यमा खेलकुद, सामाजिक तथा सांस्कृतिक केन्द्रमा रूपान्तरण गर्ने योजना रहेको छ ।
हाल भेनेजुएलामा राजनीतिक गतिविधिका कारण करिब ७११ जना व्यक्तिहरू जेलमा रहेका छन्, जसमा १८३ जना सजाय भोगिसकेका छन् । प्रमुख विपक्षी नेता र समर्थकहरूमा पूर्वसांसद फ्रेडी सुपरलानो, माचाडोका कानूनी सल्लाहकार पर्किन्स रोचा र पूर्वगभर्नर जुआन पाब्लो गुआनिपा समावेश छन् ।
आममाफी कानुनले सन् १९९९ देखि हालसम्मको राजनीतिक हिंसाको अवधि समेट्नेछ, तर हत्या, लागूपदार्थ व्यापार, भ्रष्टाचार तथा मानवअधिकार उल्लङ्घनमा दोषी ठहर भएका व्यक्तिहरू यसबाट लाभान्वित हुने छैनन् । सामाजिक तथा मानवअधिकार संस्थाहरूले यस कदमको स्वागत गर्दै पनि पारदर्शिताको आवश्यकतालाई जोड दिएका छन् ।
