पोखरा — लायन्स क्लब अफ पोखरा न्यु भिजन र सुपर भिजनको आयोजनामा तथा श्री स्वर्णकार कल्याण समिति कास्कीको सहकार्यमा रक्तदान कार्यक्रम सफलता पूर्वक सम्पन्न भएको छ। सामाजिक उत्तरदायित्वलाई प्राथमिकतामा राख्दै आयोजित कार्यक्रममा ४८ युनिट रगत संकलन गरिएको छ।
कार्यक्रमका सभाध्यक्ष लायन सुरेन्द्र रामदाम बिस्वकर्माको अध्यक्षतामा सम्पन्न कार्यक्रमको प्रमुख अतिथि लायन श्रृषि गिरी (डिस्ट्रिक ३२५ आई नेपालका डिस्ट्रिक चिफ एडभाइजर) रहेका थिए। विशेष अतिथिमा सुनचाँदी व्यवसायी महासंघका सचिव निर्मल दियाली, नेपाल रत्न तथा आभूषण व्यवसायी महासंघ गण्डकी प्रदेशका अध्यक्ष रामबहादुर बि.क., तथा पोखरा महानगरपालिका कार्यपालिका सदस्य एवं सुनचाँदी व्यवसायी संघ कास्कीका वरिष्ठ उपाध्यक्ष दिपक धिमिरेको उपस्थिति रहेको थियो।
कार्यक्रममा अतिथिहरूले रक्तदान जस्तो मानवीय कार्य समाजसेवाको उच्च उदाहरण भएको बताउँदै यस्ता कार्यक्रमले आपतकालीन अवस्थाहरूमा रगत अभावको समस्या कम गर्न मद्दत पुर्याउने उल्लेख गरे। साथै, आयोजक संस्थाहरूले आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता व्यक्त गरेका छन्।
जोन चियरपर्सन लायन राजकुमार बि. घिमिरेले कार्यक्रममा सहयोग गर्ने सम्पूर्ण रक्तदाताहरूप्रति आभार प्रकट गर्दै मानवसेवामा सक्रिय रहन सबैलाई आग्रह गरेका छन्। रक्तदानजस्ता अभियानले समाजमा एकता र सद्भाव कायम गर्न सहयोग पुग्ने विश्वास बि.घिमिरेले व्यक्त गरेका छन्।
