पोखरा, – नेकपा (एकीकृत समाजवादी) गण्डकी प्रदेश कमिटीको दोस्रो पूर्ण बैठक हिजो पोखरामा सम्पन्न भएको छ। बैठक प्रदेश अध्यक्ष कृष्ण नेपालीको अध्यक्षता तथा केन्द्रिय सचिव एवं गण्डकी प्रदेश इन्चार्ज श्रीनाथ बरालको प्रमुख आतिथ्यतामा सम्पन्न भएको हो। बैठकमा सह-इन्चार्ज तथा पोलिटब्युरो सदस्य धनराज आचार्य, पूर्व स्थायी कमिटी सदस्य एवं केन्द्रिय सदस्य तुलबहादुर गुरुङ लगायतका नेताहरूले शुभकामना मन्तव्य दिएका थिए।
बैठकमा केन्द्रिय सदस्यहरू, केन्द्रिय निकायका प्रतिनिधिहरू तथा अतिथिहरूको उपस्थिति रहेको थियो। उपाध्यक्ष मुक्तिनाथ पौडेलले स्वागत मन्तव्य दिएका थिए भने सचिव ठाकुर प्रसाद शर्माले बैठक सञ्चालन गरेका थिए। बैठकमा मुस्ताङ, नवलपुर, तनहुँ, गोर्खा, कास्की, स्याङ्जा लगायतका जिल्लाका अध्यक्षहरूले पार्टी गतिविधि, संगठन विस्तार तथा स्थानीय मुद्दाहरूको रिपोर्टिङ प्रस्तुत गरेका थिए।
बैठकले जेष्ठ १५, २०८२ भित्र गण्डकी प्रदेशका सबै जिल्ला अधिवेशन सम्पन्न गर्नेनिर्णय गरेको छ। साथै, बैशाख २२ सम्मको पहिलो चरणको आन्दोलनलाई भव्य रूपमा सम्पन्न गर्न कार्ययोजना अघि सारिएको छ। बैठकले विकास र समृद्धिको लागि जनताका मागहरूलाई सम्बोधन गर्दै चरणबद्ध आन्दोलन गर्ने प्रतिबद्धता व्यक्त गरेको छ।
यसैगरी, बैठकले चैत १५ गते राजावादी समूहहरूले काठमाडौंस्थित पार्टी कार्यालय, जिल्ला कमिटी कार्यालय, अध्यक्ष माधव नेपालको निवास तथा सर्वसाधारण नागरिकका घर, पसल लगायत सम्पत्तिमा गरेको आगजनी, तोडफोड र लूटपाटको कडा निन्दा गरेको छ। सुरक्षा दिन नसकेको भन्दै सरकारको आलोचना गर्दै बैठकले पीडितहरूलाई क्षतिपूर्तिको माग गरेको छ।
बैठकले प्रदेश कमिटीका पदाधिकारी तथा सदस्यहरूको कार्य विभाजन गर्दै सचिवालय समेत गठन गरेको छ। बैठकले संगठन सुदृढीकरण, आन्दोलनलाई प्रभावकारी बनाउने तथा पार्टी गतिविधिलाई थप सक्रिय बनाउने निर्णय गरेको सचिव ठाकुर प्रसाद शर्माले जानकारी दिए।
