राजधानी काठमाडौंको तीनकुने क्षेत्रमा राजसंस्था पक्षधरको प्रदर्शन उग्र बन्दै गएपछि सरकारले सेना परिचालन गरेको छ। स्थिति नियन्त्रणबाहिर जान थालेपछि जिल्ला प्रशासन कार्यालय, काठमाडौंले तीनकुनेसहित सिनामंगल, गौशाला, बानेश्वर, शंखमुल र कोटेश्वरलगायतका क्षेत्रमा कर्फ्यु आदेश जारी गरेको छ।
प्रदर्शन हिंसात्मक बनेपछि भीड नियन्त्रण गर्न प्रहरीले अश्रुग्यास प्रहार गरेको थियो। तर, स्थिति थप तनावपूर्ण हुँदै गएपछि सेना परिचालन गरी सुरक्षा व्यवस्था कडा पारिएको छ। प्रदर्शनकै क्रममा भएको आगजनीमा परी टेलिभिजनका लागि दृश्य खिचिरहेका पत्रकार सुरेश रजकको जलेर मृत्यु भएको छ। पत्रकार रजकको निधन प्रति मेयर आचार्यले हार्दिक श्रद्धाञ्जली तथा समवेदना व्यक्त गरेका छन्। साथै, अन्य घाइतेहरूको शीघ्र स्वास्थ्य लाभको कामना पनि गरेका छन्।
सुरक्षाकर्मीको बन्दुक खोस्ने र दमकलमाथि ढुंगामुढा गर्ने जस्ता घटना पछि तीनकुने क्षेत्र अशान्त बनेको थियो। यस्तै, कोटेश्वरस्थित भाटभटेनी सुपर स्टोरमा प्रदर्शनकारीहरूले तोडफोड गरी मोबाइल, घडी र मदिराजस्ता महँगा सामान लुटेको प्रहरीले जनाएको छ। एकीकृत समाजवादी पार्टीको कार्यालयमा समेत आगजनी भएको छ।
पोखरा महानगरपालिकाका मेयर धनराज आचार्यले आजको तोडफोड र आगजनीप्रति आपत्ति जनाउँदै सार्वजनिक सम्पत्तिमाथि आक्रमण गर्नु कुनै पनि हालतमा उचित नभएको बताएका छन्। “दंगा र तोडफोडले लोकतान्त्रिक मूल्यलाई कमजोर बनाउने भएकाले सबै पक्ष संयमित हुनुपर्छ,” उनले भने।
