कास्की-पोखरा समाज जापानले जापानको राजधानी टोकियोस्थित उएनो पार्कमा ‘हानामी तथा पोखरा पर्यटन वर्ष प्रवर्द्धन तथा प्रचारात्मक कार्यक्रम’ सम्पन्न गरेको छ।
जापानमा बस्ने नेपाली समुदायलाई मात्र नभई सम्पूर्ण जापानी नागरिकलाई समेत कास्की र पोखराको पर्यटन प्रवर्द्धनमा सहभागी गराउन उत्प्रेरित गर्ने उद्देश्यले आयोजित उक्त कार्यक्रममा पोखरा महानगरपालिकाका नगरप्रमुख धनराज आचार्यले अनलाइनमार्फत प्रमुख अतिथिको रूपमा सहभागिता जनाएका थिए। त्यस अवसरमा मेयर आचार्यले उक्त कार्यक्रमले नेपाल भ्रमणका लागि जापानी नागरिकलाई प्रोत्साहित मिल्ने अपेक्षा गरेका थिए। उनले पोखरा भ्रमण वर्ष लक्षित कार्यक्रम आयोजना गरिएकोमा खुशी व्यक्त गर्दै संसारभर रहेका पोखरेलीहरू एकजुट हुनुपर्ने र आ-आफ्नो तर्फबाट सकेको योगदान गरी जन्मभूमिप्रति प्रेम दर्शाउनुपर्ने कुरामा जोड दिए।
विशेष अतिथि बुद्धि गौचनले कास्की पोखरा समाज जापानले आयोजना गर्ने हरेक कार्यक्रममा आफ्नो साथ र सहयोग रहने प्रतिबद्धता जनाए।
एनआरएनए जापानका अध्यक्ष नविन न्युरेले पोखरा ‘अघोषित सदाबहार पर्यटन गन्तव्य’का शहर रहेको जिकिर गर्दै पोखराको पर्यटन प्रवर्द्धनमा सबैले योगदान दिनुपर्ने बताए ।
संस्थाका अध्यक्ष कमल बास्तोलाले जापानी नागरिकलाई नेपाल भ्रमण गर्न प्रेरित गर्नु आवश्यक रहेको उल्लेख गरे ।
सस्थाका उपाध्यक्ष तथा कार्यक्रम संयोजक मनोज तिवारीको संयोजकत्वमा सम्पन्न उक्त कार्यक्रममा महासचिव जीवन पोखरेल (कञ्चन) ले पोखराको पर्यटन प्रबर्धन गर्ने खालका कार्यक्रमहरुलाई जाआनमा मात्र नभई विश्वभर फैलिने गरी प्रचार – प्रसार गरिनुपर्ने कुरामा जोड दिए।
कार्यक्रम संयोजक मनोज तिवारीले उपस्थित सबैलाई धन्यवाद दिँदै संस्थाको मुख्य उद्देश्य जापानमा रहेका सबैलाई नेपाल भ्रमण गर्न प्रोत्साहित गर्नु रहेको स्पष्ट पारे ।
