कास्कीमा स्वतन्त्र विद्यार्थी युनियनको निर्वाचनलाई लिएर नेपाली कांग्रेस र नेपाल विद्यार्थी संघ (नेविसंघ) का केन्द्रीय सदस्यहरूबीच विवाद चुलिएको छ। नेविसंघका कास्कीबाट प्रतिनिधित्व गर्ने ११ जना केन्द्रीय सदस्यहरूले पार्टी कास्की जिल्ला सभापति किशोरदत्त बराललाई आर्थिक अपचलन र कांग्रेसलाई ‘बिक्री’ गरेको आरोप लगाएका छन्।
बिहीबार पोखरामा आयोजित पत्रकार सम्मेलनमा केन्द्रीय सदस्यहरू राजेन्द्र बराल, नसिब गुरुङ, अन्जान थापा, संस्कार कोइराला, विक्रम आदित्य सिंह गिरीलगायतले सभापति बराललाई कारबाही गर्न पार्टीको केन्द्रीय अनुशासन समितिका संयोजक आनन्दप्रसाद ढुङ्गानालाई सम्बोधित पत्र बुझाएका छन्। सो पत्रको बोधार्थ गण्डकी प्रदेश, कास्की जिल्ला र पार्टी केन्द्रीय समितिलाई दिइएको छ।
पश्चिमाञ्चल इन्जिनियरिङ क्याम्पसको स्वतन्त्र विद्यार्थी युनियन निर्वाचनमा उम्मेदवार टुंगो लगाउने अधिकार इकाइ समितिलाई दिइए पनि सभापति बरालले हस्तक्षेप गरी मनोनयनपत्र च्यातेको आरोप छ। नेविसंघ अध्यक्ष दुजाङ शेर्पाले प्रशान्त उपाध्यायलाई सचिव पदको आधिकारिक उम्मेदवार घोषणा गरे पनि एमाले, माओवादी केन्द्र र क्याम्पस प्रशासनसँग मिलेर बरालले संघको अस्तित्व कमजोर बनाएको दाबी गरिएको छ।
क्याम्पसमा तालाबन्दी भएको बेला सभापति बरालको निर्देशनमा ताला फुटाएर आन्दोलन दबाउन प्रहरी प्रयोग गरिएको आरोप छ। क्रियाशील विद्यार्थीहरूलाई गुटबन्दीका आधारमा हतोत्साहित गर्दै आर्थिक अपचलन गरेको आरोप पनि लगाइएको छ। कारबाही नभए सात दिनभित्र सशक्त आन्दोलन गर्ने चेतावनी दिइएको छ।
